Dili, Atu festeja loron bo’ot Natal 2022 no Tinan Foun 2023, Komandu Polísia Nasional Timor-Leste (PNTL) sei halo Operasaun LILIN iha teritoriu Timor laran tomak hodi garante seguransa ba ema hotu.
Porta Voz Komandu PNTL Superintendente Xefe Arnaldo Araújo liu husi konferensia imprensa kuarta-feira (14/12) ne’e hateten atu sidadaun hotu bele komemora Festa Natal no Tinan Foun ho hakmatek maka Komandu PNTL hasai ona Ordem Diretiva Operacional ba Komandu PNTL munisipiu 14 hodi implementa.
“Situasaun jerál iha Teritoriu Timor laran hahu’u husi: Terestre, Maritima no Aero situasaun lao kontroladu no ba Komunidade hotu iha Loron bo’ot Natal no Tinan Foun, PNTL sei garante seguransa iha tempu ida ne’e, husu ba parte hotu atu koopera ho Autoridade seguransa”, tenik Porta Voz Komandu PNTL ne’e.
Superintendente Xefe apela ba públiku atu labele naran sunu Fugetes/ Painson, maibé autoriza deit sunu iha tempu Natal no Tinan Foun. Husu mós atu labele sunu Fugetes iha edifisiu bo’ot sira nia oin no mós iha merkadoria, hanesan mós iha fatin sira komersiu nian tanba aktu sira ne’e bele fó impaktu ba ema nia hakmatek.
“Informa ba públiku, iha loron Bo’ot (Natal & Tinan Foun) antes atu viajem ba munisipiu, husu atu halo aproximasaun/kontaktu ho Autoridade Munisipiu sira, hodi hatene informasaun ou situasaun KLIMA (tamba agora iha tempo Udan no Rai Monu) hodi bele evita mosu sidente ne’ebe maka ita hotu la espera”, hatutan Superintendente Xefe ne’e.
Xefe Gabinete Relasaun Internasional PNTL ne’e apela mós ba funsionariu públiku sira hotu atu labele utiliza transport State nian iha tempu Natal no Tinan Foun. Sirkulasaun transporte Estado nian só bele halo wainhira iha Karta Guia de Marsa ka Ordem Servisu ruma, tanba sei iha ekipa konjunta ida maka sei halo aktividade pasa revista ka Operasaun iha tempu feriadu nia laran.
Asidente Fulan Dezembru
Hahu’u husi loron 01 fulan Dezembru tinan 2022 to’o loron 05, Komandu PNTL rezista sidente hirak ne’ebe maka akontese iha teritoriu nasional maka hanesan: Kanek kma’an= 33, Kanek Todan= 8, Mate= 5, Prosesu ba Tribunal= 4 no Sei iha Prosesu hela= 9; Fatór Asidente maka kondisaun Dalan, Veíkulu no ema. Media PNTL.
Fonte: Polícia Nacional do Timor Leste.
